Patay na ang gikaintapan nga robbery gang leader nga taga Argao, Cebu nga si Roel Gomez (dili ang ex-PBA player nga si Rhoel Gomez).

Si Gomez, 40, alias "Santino", mao sab ang "NO. 1 MOST WANTED" sa tibuok Rehiyon 7. 

Napatay si Gomez kaganihang pasado alas 3:00 sa kaadlawon, Martes, Oktobre 22 didto sa gikatulgan nga balay niini sa Sitio Magkabayo, Barangay Capio-an bukirang bahin sa Argao human siya nakig-engkwentro sa grupo ni Argao Chief of Police Major Janus Giangan dihang mupatuman unta sa walo (8) ka Warrant of Arrest ngadto sa most wanted nga robbery gang leader. 

Dihang nakamatikod nga dunay polis sa palibot namusil pag-una si Gomez apan nibawos ang grupo ni Major Giangan hinungdan nga kini naigo ug gideklarar nga Dead on Arrival sa Isidro Kintanar Memorial Hospital diin siya gidala. 

Gawas sa pagkamatay ni Gomez nga armado ug .45 kalibre nga pistola nadakpan sab sa mga polis ang giingong sakop sa iyang grupo nga si Loquinario Davin, Jr., 29. 

Sa walo ka Warrant of Arrest ni Gomez dunay tulo (3) niini sa murder; homicide; paghupot ug illegal nga druga ug dili lisensyado nga armas. 

Ang grupo ni Gomez nga napatyan na sab ug pila ka myembro sa sayo pa maoy gitumbok nga responsable sa mga tulis ug uban pang illegal nga aktibidades sa habagatang bahin sa Probinsya sa Sugbu diin ilang gihimong basi ang Argao sanglit mulopyo si Gomez sa Barangay Lengigon sa maong lungsod.