Kalit nga mitaliwan kaganihang pasado alas 11:00 sa buntag, Enero 7, ang negosyante nga taga Davao City nga si Philip "Sonny" Dizon, 69, human madisgrasya sa iyang gimaneho nga Can-Am All Terrain Vehicle (ATV) didto sa Bansalan-Balutakay Road, Davao del Sur.

Segun sa inbestigasyon gikan sa Davao City si Dizon paingon sa Brgy. Malataga, Bansalan dihang nalabay siya sa iyang gimaneho nga three-wheeled ATV nga nabalitok dihang kalit siya nga mipreno arun nga dili siya mabangga sa usa ka truck nga iyang nakasugat diha sa pikas lane human siya mu-over take ug laing sakyanan. 

Gidala pa sa Davao del Sur Provincial Hospital sa Digos City si Dizon apan didto na kini nakabsan sa iyang kinabuhi tungod sa grabeng kadaot sa lawas nga iyang naangkon.

Mahimong suod ni kanhi Presidente Rodrigo Duterte, si Dizon mao ang tag-iya sa ilado nga Crocodile Park, Dizon Farms ug Mt. Apo Highlands Resort. Siya sab ang kanhi Presidente sa inpluwensyal nga American Chamber of Commerce and Industry didto sa Davao.