Gidakop sa kapolisan didto sa Bohol ang usa ka Danish national kinsa gikonbikto sa korte sa kasong child abuse (lascivious conduct) ngadto sa duha ka menor de edad nga lalaki.

Si Lars Flemming Heding Nielsen, 63, gidakop sa hiniusang pwersa sa Panglao ug Dauis municipal police stations niadtong Disyembre 28 sa Brgy. San Isidro, Dauis human nga siya makonbikto ni Hon. Judge Leo Moises Lison sa Tagbilaran City RTC Branch 3 sa seven (7) counts of "sexual intercourse of lascivious conduct" segun sa Article lll Section 5 (b) sa Republic Act 7610 kun Special Protection of Children Against Abuse, Exploitation and Discrimination Act.

Basi sa records sa kaso ang mga biktima nga 14 ug 16 anyos pa niadtong panahona giabuso ni Nielsen didto sa usa ka resort sa Panglao niadtong tuig sa 2014 ug 2015.

Piyansado pa unta ang maong Denmark citizen sa wala pa ang iyang conviction apan wala na kini nakagawas sa Pilipinas human nga gipagawas ang Hold Departure Order batok kaniya niadtong tuig 2021.

Ang conviction ni Nielsen maoy labing unang higayun nga dunay nakonbikto nga foreign national sa Bohol sa kasong sexual abuse.