Kinsay wala nakaila ni Cebu City councilor Donaldo "Dondon" Hontiveros nga taga dinhi ning maong siyudad? 

Tingali bisan usa walay makaingon nga wala makaila niya tungod sa iyang ka popular kay kanhi PBA star player unya numero uno nga konsehal sa Cebu City south district.

Apan tingali dunay wala mahibalo nga si Kons Dondon maoy chairman sa committee on education sa konseho sa siyudad nga tungod niining hulga sa taas nga heat index mugna sa El Nino karung panahona angayan unta mutingog ug mubarug alang sa kaayuhan sa mga tinun-an sa siyudad.

Tingali busy lang gyud kaayo si Kons Dondon kay siya man sab ang focal person sa umaabot nga Palarong Pambansa 2024 karung Hulyo diin host ang Cebu City apan angayan sab siya pahinumduman nga karun ang tukma nga panahon nga siya mutingog.

Syalan man Kons, okay ra ka nga ang mga estudyante sa siyudad pamathon ug kaadlawon kay mag-apas sa alas 6:00 sa buntag nga sugod sa klase segun sa Executive Order nga gi-isyu ni Mayor Michael Rama?

Nga segun gihapon sa EO muuli ug hapit na gyud udtong tutok nga init kay ang tingsira dili man (not later than) mulapas sa alas 12:00 sa udto?

Nya tungod kay modified school hours dunay uban nga alas 4:00 sa hapon ang klase unya mauli ug gabii na kaayo kay ang dismissal alas 9:00 nga busa kuyaw ug maglakaw nga murang usa sa karsada?

Tingog sab kuno Kons, praktis kunog tingog, ganahan ra ba ka mag congressman, uwaw ra ba nang tawgon nya ta ug myembro sa committee on silence, dili ba?